1341) Ek soek ’n maat

Hoog bo
tussen die lang
maer vlieswolke
vlieg hy op die windstrome

elke jaar kom hy
vanaf sy bergwêreld
na paarland

sy skril gefluit
weerklink teen die koppies
seil oor die vlaktes

dit is nou al 30 dae
dat hy roep

sy maat van laasjaar
is nie hier nie

min weet hy
sy hang verstrengel
in die drade
van vooruitgang

swaarmoedig vlieg hy terug
na sy bergtop

waar hy vir jare
tevergeefs sal wag

en roep

totdat sy stem so hees is

soos die van ’n kolgans

Liked it? Share it please ...