1902) Mamma is ek ’n fout vra pietie

Toe ek nog deel van jou was
kon ek voel hoe ruk ruk jou lyf

jou huil kon ek ervaar

maar mamma waarom huil jy altyd
as die oom op jou skreeu

ek is nou 1 jaar oud sê pietie
ek kan al ‘n bietjie verstaan

mamma ek is nou al 2 jaar oud
en huil ook as die oom vir mamma ruk

mamma ek is nou 3 jaar oud
ek kan al mamma sê
maar nie pappa sê

want my pappa is ’n asem
’n pappa sal nie raas
met ’n mamma nie

net ’n oom sal

mamma ek is nou 12 jaar oud
en verstaan nou al van
die dinge van die lewe
ek het al ’n kettie

waarom word jou oog leeg
as hy hier kom
mamma jy is bang vir hom

mamma ek weet hy het jou geld
gevat

mamma so ’n nul is nie my pa nie

by die skool sê die kinders
as jy huil sal die engele
jou trane afdroog

mamma ek het nog nie
’n engel gesien nie
maar ek weet

die duiwel is nog hier

mamma is ek ’n fout ?

Liked it? Share it please ...